بلو يولك→ الرئيسية

آخر تحديث: ١٧ نوفمبر ٢٠٢٦

الخصوصية والشروط

باختصار: نجمع أقل شي نحتاجه عشان نسلّم شغلك، ما نعرضه لأحد، ونمسحه بعد التسليم.

١. وش نجمع

  • اسمك واسم نشاطك.
  • رقم واتساب اللي تتواصل منه.
  • روابط المقاطع والصور اللي ترسلها، وملاحظاتك على الشغل.
  • بيانات الفاتورة: رمز المشروع، المبلغ، وتاريخ الدفع.

ما نجمع رقم بطاقتك ولا بياناتها. الدفع يتم في صفحة بوابة الدفع نفسها، واحنا نشوف بس إن الدفعة وصلت.

٢. ليش نجمعها

عشان ننفّذ طلبك، نرسل لك عرض السعر والفاتورة، ونتواصل معك عن المشروع. ما نستخدم بياناتك للإعلانات، وما نبيعها ولا نشاركها مع أحد.

٣. الموقع نفسه

  • ما فيه حسابات ولا تسجيل دخول، ولا ملفات تتبّع (كوكيز) للإعلانات أو التحليلات.
  • نموذج الطلب ما يرسل شي لخوادمنا: يجهّز رسالة واتساب، وأنت اللي ترسلها بنفسك.
  • الموقع مستضاف على Cloudflare، والخطوط محفوظة على موقعنا نفسه. Cloudflare تشوف بيانات تقنية عامة مثل عنوان الإنترنت ونوع المتصفح، لأغراض الحماية والتشغيل.
  • نستخدم إحصاءات الزيارات من Cloudflare، وهي بدون كوكيز وبدون تتبّع شخصي: تعطينا أرقام عامة مثل عدد الزوار والصفحات والدول.

٤. السرية

نوقّع معك اتفاقية سرية قبل أول ملف. ما نعرض اسمك ولا لقطاتك، ولا نقول إننا اشتغلنا معك، إلا إذا طلبت أنت ذلك كتابياً.

٥. متى نمسح ملفاتك

حمّل ملفاتك النهائية واحفظها عندك خلال ٣٠ يوم من التسليم. بعد ٣٠ يوم نمسح المواد الخام والملفات النهائية من أجهزتنا، ونرسل لك رسالة: انمسحت. نحتفظ فقط بالفواتير وسجلّ الدفع للمدة اللي يتطلبها النظام المحاسبي.

٦. من يشوف بياناتك

  • فريق بلو يولك اللي يشتغل على مشروعك فقط.
  • بوابة الدفع، لمعالجة الدفعة.
  • خدمة التخزين اللي تختارها أنت لرفع الملفات (مثل Google Drive أو WeTransfer).

٧. حقوقك

تقدر في أي وقت تطلب نسخة من بياناتك، أو تصحيحها، أو مسحها قبل الموعد. أرسل لنا على واتساب ونرد عليك خلال يوم عمل.

٨. كيف يمشي الطلب

  • السعر اللي يطلع لك في الموقع تقريبي. السعر النهائي يوصلك مكتوب على واتساب، برمز المشروع، قبل ما تدفع.
  • نبدأ الشغل بعد ثلاث أشياء: موافقتك على العرض، تأكيد الدفع، ووصول المقاطع كاملة.
  • الطلب الفوري توصلك نسخته الأولى خلال ١ إلى ٣ ساعات من بدء الشغل، لطلبات لين ٣ مقاطع كل واحد لين دقيقة، أو لين ١٠ صور، في أوقات العمل.
  • إذا مو مستعجل، تقدر تختار التسليم خلال ٢٤ ساعة بسعر أقل. والطلبات الفورية الأكبر من هذا الحد تسليمها خلال ٢٤ ساعة.
  • موعد التسليم يتأكد لك مكتوب على واتساب مع العرض، قبل ما تدفع.
  • الباقات الشهرية لها جدول تسليم نتفق عليه معك. والطلبات الأكبر موعد تسليمها مكتوب في العرض.
  • إذا وصل طلبك خارج أوقات العمل، نخبرك بموعد البدء قبل ما تدفع.
  • كل طلب يشمل جولتين تعديل مجانية على نفس الفكرة. التغيير الكامل للفكرة أو المواد يعتبر طلب جديد.

٩. المواد والحقوق

  • الملفات النهائية لك بالكامل بعد الدفع.
  • أنت مسؤول إن عندك حق استخدام المقاطع والصور والموسيقى اللي ترسلها.
  • الموسيقى اللي نضيفها احنا تكون مرخّصة للاستخدام التجاري على المنصات اللي حددتها.

١٠. الدفع والاسترجاع

  • الأسعار بالريال السعودي، وتدفع عبر رابط دفع آمن باسم المشروع ورمزه. ما نطلب رقم بطاقة ولا رمز تحقق على واتساب أبداً.
  • إذا ألغيت قبل ما نبدأ الشغل: نرجّع لك المبلغ كامل.
  • إذا تأخرنا عن موعد التسليم: ينطبق ضمان الدقيقة، وكل دقيقة تأخير تنخصم من سعر الطلب وترجع لك تلقائياً.
  • بعد ما تستلم الملفات وتعتمدها: ما فيه استرجاع، لكن جولات التعديل متاحة.
  • الاسترجاع يرجع لنفس طريقة الدفع، وتختلف مدة وصوله حسب البنك.

١١. ضمان الدقيقة

وقتك له قيمة. إذا تأخرنا، الدقيقة علينا.

  • وش يشمل: النسخة الأولى من الطلبات الفورية، بالخيارين: خلال ١ إلى ٣ ساعات، أو خلال ٢٤ ساعة. ما يشمل الباقات الشهرية، ولا الطلبات اللي موعد تسليمها مكتوب في العرض.
  • متى يبدأ الوقت: من آخر هالثلاث: موافقتك على العرض، تأكيد الدفع، ووصول المقاطع كاملة وتفتح بدون مشاكل. إذا كملت خارج أوقات العمل، يبدأ الوقت مع بداية أوقات العمل اللي بعدها، ونخبرك بموعد البدء قبل ما تدفع.
  • متى نعتبر متأخرين: إذا ما وصلتك رسالة النسخة الأولى على واتساب قبل نهاية الموعد: ٣ ساعات من بدء الوقت لخيار ١ إلى ٣ ساعات، و٢٤ ساعة لخيار ٢٤ ساعة. وقت إرسال رسالتنا هو المرجع.
  • كم ينخصم: ١٪ من سعر الطلب عن كل دقيقة تأخير كاملة، لين حد أقصى ٥٠٪ من سعر الطلب.
  • كيف يرجع لك: تلقائياً، بدون ما تطلب. نرجّع المبلغ على نفس طريقة الدفع خلال ٣ أيام عمل من التسليم، أو نخليه رصيد لطلبك الجاي إذا تفضّل.
  • متى يوقف الوقت: إذا كنا ننتظر منك شي نحتاجه عشان نكمل، مثل ملف ناقص أو ما يفتح، أو رد على سؤال، أو موافقة. ويوقف كذلك إذا غيّرت المطلوب بعد ما بدأنا (يعتبر طلب جديد بموعد جديد)، أو صار انقطاع عام خارج عن إرادتنا في خدمات مثل واتساب أو التخزين أو بوابة الدفع أو الإنترنت أو الكهرباء.
  • حدود الضمان: الضمان يخص النسخة الأولى فقط، وجولات التعديل لها مواعيد نتفق عليها معك. هذا الخصم هو التعويض الوحيد والكامل عن أي تأخير في التسليم، وإجمالي مسؤوليتنا عن أي طلب ما يتجاوز المبلغ اللي دفعته فيه.

١٢. تواصل معنا

أي سؤال عن خصوصيتك أو عن الشروط، أرسل لنا على واتساب.

راسلنا على واتساب